ڈسٹ بِن
ڈسٹ بِن میں سب کچھ ڈالا جا سکتا ہے
گھر کا کچرا
چھوٹا موٹا فالتو سامان
خالی لِپ اسٹک
ٹوٹی ہوئی چوڑیاں
قیمتی گُلدان کے ٹکٹرے
استعمال شدہ ٹشو
بچوں کی پھینکی ہوئی چیزیں
زنگ آلود ریز اور ناکارہ آئینے
پھلوں کے چھلکے
بچا ہوا کھانا اور وہ سب الم غلم
جو تم روز ڈسٹ بِن میں
آنکھیں بند کر کے ڈالتے ہو
لیکن ٹھہرو
تم نئے دور کے لگتے ہو
اس لیے ڈسٹ بِن میں ڈال سکتے ہو
اپنی بے وفائیاں
جھوٹے وعدے
منافقت کی نقابیں
بچا کھچا اخلاص
زندہ رہ جانی والی مروت
رشتوں کی مسخ شدہ صورتیں
ترکِ تعلق کا کرب اور انتشار
خوابوں اور عذابوں کا بوجھ
گناہوں کی چھن
خوشگوار یادوں کا انبار
ناخوشگوار لمحات کا عکس
ہجر کے دنوں کی تلخی
اپنے ہونے کا احساس
محبت اور نفرت کے بچے کھچے ذائقے
اور مصنوعی وصال کی باقیات
خالد معین
No comments:
Post a Comment