شب وصال کا چہرے پہ رنگ مل کر بھی

 شبِ وصال کا چہرے پہ رنگ مل کر بھی

وہ تیرگی میں رہا چاندنی میں ڈھل کر بھی

نقاب چہرے پہ اپنے سجا لے کتنے ہی

تُو آج بھی ہے وہی پیراہن بدل کر بھی

کسی کی چھاؤں نے بخشا نہیں قرار مجھے

میں بے سکوں ہی رہی دھوپ سے نکل کر بھی

تِرے وجود سے لپٹی تھی کیسی کجلاہٹ

تُو صاف ہی نہ ہوا آنکھ میں اجل کر بھی

سمجھ میں آئیں گے پیروں کے آبلے میرے

کبھی تو دیکھو، مِری راہ گزر پہ چل کر بھی

یہ ٹھوکریں ہیں کہانی مرے مقدر کی

سو بار بار گِری ہوں سحر سنبھل کر بھی

شائستہ سحر