غم ہے بلا کہ وحشت سرکار ہے گرو

 غم ہے بلا کہ وحشتِ سرکار ہے گُرو

گردن پہ اپنی ان دنوں تلوار ہے گرو

اٹھتے ہی من کی بات کرے گا ابھی یہاں

سونے دو اس کو ذہن سے بیمار ہے گرو

جس کی وفا پہ رشک کناں میرا شہر تھا

وہ شخص میری راہ کی دیوار ہے گرو

خود کو حسینی کہتا ہوا پھر رہا ہے تُو

پھر کیوں یزیدیوں کا طرفدار ہے گرو

ہم کو جمال یار کی گلیوں سے ہے شغف 

جننت کا تیری کون طلبگار ہے گرو 

نفرت کے بیج بو گئے جس دن سے تم یہاں

ہر راہ میرے شہر کی پُر خار ہے گرو

کیوں بانٹتا ہے پھر مجھے مسلک کے نام پر 

تُو تو میرے قبیلے کا سردار ہے گرو

خود کے بچھائے جال میں پھنستا چلا گیا 

سمجھا تھا میں نے خوب سمجھدار ہے گرو

پھر بھی ہے یہ امید کی ساحل کو پائے گا

کاغذ کی جس کے ہاتھ میں پتوار ہے گرو

اب دیکھنا ہے آئے گا کب انقلاب دل 

ہاتھوں میں اب قلم نہیں ہتھیار ہے گرو

دل سکندر پوری