مُسرتوں کا سماں دیر تک نہیں رہتا
دِیا بجھے تو دُھواں دیر تک نہیں رہتا
شباب آتا ہے لےکر پروں کو ساتھ اپنے
زمیں پہ کوئی جواں دیر تک نہیں رہتا
حساب سودِ محبت کا یاد کیا رکھتے
ہمیں تو یاد زیاں دیر تک نہیں رہتا
مِری خطاؤں کو گر وہ معاف کر دیتا
تو دل پہ بارِ گراں دیر تک نہیں رہتا
فلاح اس کو بُلاتی ہے، یہ خبر ہے جسے
وہ گھر میں سُن کے اذاں دیر تک نہیں رہتا
جو مُشکلات کا کرتے ہیں سامنا ہنس کر
یہ غم انہی کے یہاں دیر تک نہیں رہتا
ہزار کوششیں کر لیں مگر زمانے سے
کسی کا درد نہاں دیر تک نہیں رہتا
یہ کیسا دور ہے آیا کہ ملک میں انجم
کہیں گُمانِِ اماں دیر تک نہیں رہتا
شاداب انجم
No comments:
Post a Comment