نقابِ تجلی اٹھانے لگے
مِرے دل کو وہ آزمانے لگے
تصور میں جب سے وہ آنے لگے
شبِ ہجر ہم مسکرانے لگے
خدا جانے ساقی نے کیا کر دیا ہے
جو ہم بے پیئے لڑکھڑانے لگے
اُدھر بجلیاں رقص کرنے لگیں
اِدھر ہم نشیمن بنانے لگے
میں جتنا انہیں بھُول جانے لگا
وہ اتنا مجھے یاد آنے لگے
مِرے نام سے برہمی تھی انہیں
جو دیکھا مجھے مسکرانے لگے
غمِ عشق تیری نوازش ہم
غمِ زندگی بھول جانے لگے
بلندی دیر و حرم جھک پڑی
سرِ شوق جب ہم جھکانے لگے
نکھرنے لگا جب سے آنکھوں میں غم
ستارے نئے جھلملانے لگے
جنوں کا خِرد نام لے کر بڑھی
کبھی تو قدم ڈگمگانے لگے
بیاباں میں رنگ و چمن آ گیا
مِرے اشک خون رنگ لانے لگے
سمجھتے تھے جو خود کو وطن شناس
کنارے پہ وہ ڈوب جانے لگے
میرے دل کو اک آسرا مل گیا
وہ بزمی مجھے یاد آنے لگے
بزمی احمد
No comments:
Post a Comment