عشق سچا ہے اگر سوزِ نہانی مانگے
ہجرِ محبوب میں وہ اشک فشانی مانگے
اک نئی لکھنے کو تاریخ کہانی مانگے
ہر نیا دور الگ اپنی نشانی مانگے
سیلِ غارت جو کسی جا پہ روانی مانگے
زد پہ سب پیری و طفلی و جوانی مانگے
واسطہ ایسے مسافر کا سرابوں سے رہا
شاہراہوں سے بھٹک کے جو نہیں پانی مانگے
استقامت کی طلب گار ترقی ہے کبھی
اور یہ ہم سے کبھی نقل مکانی مانگے
استعاروں میں الجھنے کی نہیں اب فرصت
آج سامع یوں ہی شعروں میں روانی مانگے
شاعری نام رضیہ نہيں تُک بندی ہے
ہر کوئی شعر میں الفاظ و معانی مانگے
رضیہ کاظمی
No comments:
Post a Comment