کمال شب تھا کہ مجھ سے جدا ہوا نہ کبھی

 کمالِ شب تھا کہ مجھ سے جُدا ہوا نہ کبھی

میرا رفیقِ سفر جو مجھے ملا نہ کبھی

بچھڑ کے مجھ سے تجھے زخم لگ گئے کیا کیا

یہ ایک زخمِ ندامت کہ جو بھرا نہ کبھی

سُبک ہے، تر ہے، تہی ہے، خبر نہ تھی ورنہ

میں ایک پَل تیرے دامن کو چھوڑتا نہ کبھی

میں خوش نہیں کہ میرے حرف کی امان میں ہے

تیرا خرام کہ ہوتا تھا والہانہ کبھی

زمین پہ موسمِ گل کا خمار آتے ہی

فلک کی آنکھ میں خوں ہے کہ پہلے تھا نہ کبھی

عذاب میں ہے نظر، رو میں ابرِ امکاں ہے

کبھی سراب، کبھی سنگ، تازیانہ کبھی

کھٹک رہا ہے نگاہِ گُہر فروشاں میں

وہ ایک شیشۂ سادہ کہ جو بکا نہ کبھی

مبارک حیدر