درد کو وجہ خرابی نہیں ہونے دیتے

 درد کو وجہِ خرابی نہیں ہونے دیتے

اپنے اشعار کتابی نہیں ہونے دیتے

یوں تو اس شخص کی ہر بات کو ہم مانتے ہیں

ہاں مگر اس کو حجابی نہیں ہونے دیتے

بھینچ کر کرتے ہیں اظہارِ محبت اس سے

اپنے بوسوں کو نصابی نہیں ہونے دیتے

عشق کرتے ہیں تو دل چیر کے رکھ دیتے ہیں

رائیگاں، دورِ شبابی نہیں ہونے دیتے

جھوٹ موٹ اس سے ہوا کرتے ہیں اکثر ناراض

اور لہجے کو عتابی نہیں ہونے دیتے

وہ غلط بات بھی کہتا ہے تو سن لیتے ہیں

اس حسین آنکھ کو آبی نہیں ہونے دیتے

گفتگو اس سے کنایوں میں  کیا کرتے ہیں

اپنے لہجے کو خطابی نہیں ہونے دیتے

رات بھر جاگتے ہیں ہجر میں اس کے اشفاق

صبح کو آنکھ گلابی نہیں ہونے دیتے

اشفاق حسین