ترے بہتے ہوئے اشکوں کی سفارش تھی بہت

 تِرے بہتے ہوئے اشکوں کی سفارش تھی بہت

ہاں مِری جانِ غزل رات یہ بارش تھی بہت

زندگی چین سے کب گزری کسی بھی صورت

ہر قدم پر مِرے رستے میں جو سازش تھی بہت

شہر کا شہر ہی اک دوجے کا دشمن نکلا

دل نہ مل پائے کسی کے بھی کہ رنجش تھی بہت

آج محفل میں ہر اک شخص کا چہرہ تھا نیا

پارسا لوگ نہ تھے پھر بھی نمائش تھی بہت

سر سے ٹل پایا نہ اپنے یہ خزاں رُت کا عذاب

پھول کب کھل سکے خوشیوں کے گو کوشش تھی بہت

اب زمانے میں بھلا کس پہ بھروسہ کیجے

سچ بھی تو جھوٹ ہی نکلا کہ واں پالش تھی بہت

عکس اس دور میں ہر شخص ہے خود اپنا امیں

کوئی بن پایا نہ اپنا مِری خواہش تھی بہت

لبنیٰ عکس