کوئی شکوہ ہے تو اس باد سبکسار کے ساتھ

 کوئی شکوہ ہے تو اس بادِ سُبکسار کے ساتھ

لے اُڑی جو تِرا آنچل مِری دستار کے ساتھ

تُو کہ وہ جس پہ سبک سیر ہوائیں قرباں

کوئی چل پائے کہاں تک تِری رفتار کے ساتھ

جیسے ٹوٹا مِرا پِندار یہ دل جانتا ہے

کاش ایسا نہ کبھی ہو مِرے غمخوار کے ساتھ

وہ جو خوش ہیں مِری رُسوائی کو نغمہ کر کے

خُوب ناچیں تِری پازیب کی جھنکار کے ساتھ

دلِ دشمن میں کوئی تیر سا کُھب جاتا ہے

لُطف اٹھاتے ہیں جو ہم اپنے ہی آزار کے ساتھ

اس طرح ساتھ ہے مجھ راندۂ دنیا کے کوئی

جیسے عیسیٰ کی دعا ہو کسی بیمار کے ساتھ

اُف یہ اجداد کی ناموس کہ جس کے ڈر سے

ہم لپٹ بھی نہیں سکتے تِری دیوار کے ساتھ

عشق کا دل میں بسیرا ہو یہ ممکن ہی نہیں

اس سیہ بخت کی بنتی ہے تو بس دار کے ساتھ

حُسن بھی داد کی حسرت میں فنا ہوتا ہے

اور ازل سے ہے یہی مسئلہ فنکار کے ساتھ

ہم اگر اس بُتِ کافر کی پرستش کرتے

دُرِ ایماں بھی گنواتے دلِ بیکار کے ساتھ

کیا مزا ہو جو مِرے ساتھ روا رکھتے تھے

اب وہی رکھیں رویہ کبھی اغیار کے ساتھ

کعبۂ عشق بچانے کا ہمیں حکم تو ہو

ہم نے تو سنگ اُٹھا رکھے ہیں مِنقار کے ساتھ

عرفی یوں ہی مجھے حسرت نہیں جاں بازی کی

مِرے اجداد کو نسبت تھی کوئی دار کے ساتھ

عرفان عرفی