ہم جو اس عہد ستمگر میں کبھی ہنستے ہیں

 ہم جو اس عہدِ ستمگر میں کبھی ہنستے ہیں 

دیکھ کر خندۂ گریاں کو سبھی ہنستے ہیں

کرتی رہتی ہیں یہ آنکھیں تو بغاوت اکثر

تیرتی رہتی ہے آنکھوں میں نمی ہنستے ہیں

تیری محفل کا تقاضا ہے کہ ہنستے جائیں

دل بھی ہنستا ہے کہ یہ کیسی ہنسی ہنستے ہیں 

سچ کہیں تم سے، کبھی جھوٹ نہیں بولتے ہم 

دنیا داری کو مگر، جھوٹی ہنسی ہنستے ہیں

یہ بھی کیا طرفہ تماشہ ہے کہ ہم پر اکثر 

جن کو روتے سے ہنسایا تھا، وہی ہنستے ہیں

خود سمجھدار ہیں وہ، کھل کے انہیں ہنسنے دو

دل لگی، جن کے نہیں دل کو لگی، ہنستے ہیں

ہم کبھی اس کا رویہ نہ سمجھ پائے خیال

اس کی باتوں پہ کبھی روتے، کبھی ہنستے ہیں

مستحسن خیال