کب اہل درد ہی بے چین ہو کے دیکھتے ہیں

 کب اہلِ درد ہی بے چین ہو کے دیکھتے ہیں 

انہیں تو سنگ بھی پلکیں بھگو کے دیکھتے ہیں 

چراغ جلتے ہیں جب روضۂ محمدﷺ پر 

تو قبرِ فاطمہ زہراؑ کو رو کے دیکھتے ہیں  

کبھی جو دُکھ کو سمجھنا ہو تو خیالوں میں 

ہم اپنی لاڈلی بیٹی کو کھو کے دیکھتے ہیں 

اذیتِ دلِ زہراؑ کو جاننے کے لیے 

ہم اپنے سینے میں خنجر کھبو کے دیکھتے ہیں 

ہمیں بنانی ہے مولائی عشق کی تسبیح 

سو اک لڑی میں دل اپنے پرو کے دیکھتے ہیں 

سب اشک ختم ہوئے اور نوحہ باقی ہے 

سو اب قلم کو لہو میں ڈبو کے دیکھتے ہیں 

رحمان فارس