تری خود پسند سرشت میں وہی اک غرور جمال تھا

تِری خود پسند سرشت میں وہی اک غرورِ جمال تھا

مِری عاجزی کے خمیر میں کوئی اور بامِ کمال تھا

تُو نگاہِ مست سے آپ ہی کسی آئینے میں بندھا ہوا

میں فریبِ ہست سے ماورا کسی زمزمے میں نہال تھا

تِرے عکس میں سرِ ریگ بھی کوئی تابِ مہر نہ تھی کہیں

مِرے تارِ تیرہ سے منسلک کوئی اور سلکِ سوال تھا

تِرے تارِ زخمہ کی نغمگی تِرے حسنِ جاں کی قصیدگی

مِرے تارِ دل کے جو زخم تھے وہ خدائے دل کا ملال تھا

مِرے یار اشکرِ بے ریا،۔ وہ فریبِ ہست میں مبتلا

میں خود اپنے آپ میں منہمک مجھے اپنا ہجر وصال تھا

اشکر فاروقی