خاک بسری تو کجا ہے چاک دامانی نہیں

 خاک بسری تو کُجا ہے چاک دامانی نہیں 

اب تو یہ دکھ ہے ہمیں کوئی پریشانی نہیں  

تختِ بلقیسِ زمانہ صحن میں اترے تو کیوں  

اب تو آنکھوں میں بھی خوابوں کی فراوانی نہیں

تشنگی کا ایسا عالم کیا کبھی دیکھا، سنا؟

گھر تو گھر ہے آنکھ میں بھی ان دنوں پانی نہیں 

ہم مسافر ہیں مسافر بھی سدا صحراؤں کے 

عمر بھر چھاؤں میسر ہی جنہیں آنی نہیں 

آ گئے ناں قیس صاحب تم بھی ان صحراؤں میں

ہم ناں کہتے تھے میاں یہ کارِ آسانی نہیں  

پاوں کی ٹھوکر پہ رکھ دے سب قبیلے کے رواج

اب وہ لڑکی عشق میں اتنی بھی دیوانی نہیں

اک نہ اک دن حرف پر ایمان لے آئیں گے لوگ 

دیکھنا میثم! یہ محنت رائیگاں جانی نہیں

میثم علی آغا