گوہرِ شہوار سے برجِ جہاں خالی ہوا
نیّرِ اوجِ شرف سے آسماں خالی ہوا
عالمِ خاکی نظر آتا ہے وِیرانے کی طرح
کیا کہوں کیسے مکیں سے یہ مکاں خالی ہوا
کیوں نہ ہو تاریک عالم، دیدۂ مُشتاق میں
نُورِ شمعِ دُودماں سے دُودماں خالی ہوا
رحلتِ سالارِ لشکر سے ہُوا لشکر تباہ
رہنمائے کارواں سے کارواں خالی ہوا
گُلشنِ جنت ہوا، معمورِ زینت ہم صفیر
اس گُلِ دستار سے ہر بُوستاں خالی ہوا
اس کے چھُپتے ہی مہِ شعباں ہوا ماہِ عزا
مومنیں کو عید کا چاند اے بیاں! خالی ہوا
بیان میرٹھی
سید محمد مرتضیٰ بیان
No comments:
Post a Comment