نگار خانۂ ہستی میں ہے قرار مجھے
تُو آسماں کی بلندی سے اب پکار مجھے
نہیں نہیں میں مکمل ابھی ہوا ہی نہیں
اے کوزہ گر نہ ابھی چاک سے اتار مجھے
خزاں بہار کی آمد کا استعارہ ہے
خزاں کی پیشرو لگتی ہے یہ بہار مجھے
تمہاری آنکھ میں ٹھہرا ملال یاد آیا
کیا ہے آج کسی نے جو اشکبار مجھے
میں پورے طور سے تجھ پہ ابھی کُھلا ہی نہیں
تُو اپنی آنکھ سے دل میں ذرا اتار مجھے
میں آسمان سے نیچے اتار لاؤں گا
کبھی چڑھا جو تِرے عشق کا خمار مجھے
بچھڑتے وقت ذرا آنکھ میں بھی نم کر لوں
دو چار اشک مِری جان دے ادھار مجھے
کسی کے حرفِ ملامت سے پیشتر شاہد
مِرا ضمیر ہی کرتا ہے شرمسار مجھے
افتخار شاہد
No comments:
Post a Comment