بات کرتی ہوئی آنکھوں سے ملاقات ہوئی
تب کہیں جا کے مِرے شہر میں برسات ہوئی
بحرِ حیرت میں اترتا ہوا دیکھا گیا میں
حسن کی ایک ادا موجِ طلسمات ہوئی
ایک پل میں شکن آلود ہوئے روح و بدن
کیا کہوں تجھ سے کہ کیا صورتِ حالات ہوئی
ورنہ لوگوں کا خدا پر سے یقیں اٹھ جاتا
اس کے ہونٹوں پہ ہنسی آئی، کرامات ہوئی
سوچتا ہوں کہ تباہی کے علاوہ کیا ہے
اس کی آنکھوں میں اگر درد کی بہتات ہوئی
وہ بھی کھیلے گا کچھ ایسے کہ لگے ہار گیا
آپ کو بھی یہ لگے گا کہ اسے مات ہوئی
ہر سماعت پہ گراں تھی جو زمانوں سے سعید
آج پھر شہر کی گلیوں میں وہی بات ہوئی
سعید راجہ
No comments:
Post a Comment