عارفانہ کلام حمد نعت منقبت
سخن کی بھیک
مدینے کے شِمال میں
اُحد کی شاہراہ پر کھڑا
یہ سوچتا تھا میں
بہت حسین وقت تھا
بڑا سہانا وقت تھا
کہ جب مِرے نبیؐ کے نازنیں قدم
پڑے دیارِ قُدس کی زمیں پر
تو خوشبوؤں کے ساتھ ساتھ
اجالے ہر طرف مہک گئے
وہی اجالے آج بھی
مہکتے ہیں گھڑی گھڑی
ہوائیں گیت گاتی ہیں
بنی نجار کی وہ نعت خوان بچیوں کے زمزمے
فضا میں گونجتے سنائی دیتے ہیں
عقیدتوں محبتوں کی لازوال روشنی
شعورِ عشق و آگہی میں
ڈُوبے عطر بیز لمحوں کا دیتی ہے
سراغ آج بھی
جدھر بھی دیکھیے
نظر اٹھا کے شہرِ پاک میں
ہر ایک سمت نور کا ظہور ہے
غبارِ درد جو میں اپنے ساتھ لے کے آیا تھا
وہ مجھ سے کوسوں دور ہے
قدم قدم مِرے تلے
علوئے کوہِ طور ہے
میں کتنا خوش نصیب ہوں میں کتنا کامگار ہوں
درِ رسولﷺ سے مجھے
سخن کی بھیک مل گئی
سخن کی بھیک مل گئی
مظہر حسین مظہر
No comments:
Post a Comment