القارعہ
ہوس کی منڈیوں میں آج بھی
محنت کشوں کے خون سے ہر سُو چراغاں ہے
زمیں کے قدرتی اور صنعتی
سارے وسائل
اور فروغِ زندگانی کے سبھی اسباب
دھرتی پر ریاست دار
جابر، سرکش و سفاک انسانوں کی
مشترکہ تجوری میں پڑے ہیں
اور معاشی قتل کے بازار میں پھیلے ہوئے
مفلس، ستم خوردہ ہنر مندوں
غریبوں، بے کسوں
مظلوم دہقانوں کے
ہر بحران کے پیچھے
تقدس کے لبادے میں چھپے
چالاک اور ناپاک ظالم حکمرانوں کی
سفلگی کار فرما ہے
اِدھر نادار اور لاچار انساں
اپنے آقاؤں کے
ان مکروہ دھندوں
جبر و استحصال
اور ظلم و تشدد کے
شکنجوں سے نکلنے کی سکت رکھتے نہیں
یا رب
تو کیا اس کاروبارِ ہست کے
بگڑے ہوئےعدل و توازن
اور زمیں کے
ان گنت جُھوٹے خداؤں کی
رعونت اور تکبر کو
تُو اپنی مہلتوں سے پھر نوازے گا
کہ ان کے کاخ و کُو پر چرخ سے
القارعہ کا بم گرائے گا
حبیب الرحمٰن مشتاق
حبیب الرحمان مشتاق
No comments:
Post a Comment