تابش حرف سے ماورا آپ ہیں

 عارفانہ کلام حمد نعت منقبت

تابشِ حرف سے ماوراء آپؐ ہیں

میرے آقاؐ رضائے خدا آپؐ ہیں

اہلِ طائف ہیں پتھر اٹھائے ہوئے

ہاتھ اٹھائے سراپا دعا آپؐ ہیں

کوئی کیا کر سکے نعت کا حق ادا

نعت سے حمد کا سلسلہ آپؐ ہیں

میں ہو ں عاصی مگر کیسے ہو بے اثر

جس مناجات کا واسطہ آپؐ ہیں

دین و دنیا کی سب نعمتیں مانگ لوں

مجھ سیہ بخت کا حوصلہ آپؐ ہیں

آسمانِ نبوتﷺ منور سہی

ضو مگر جس کی سب سے جدا آپؐ ہیں

سنگِ اسود بھی دے گا گواہی یہی

امنِ عالم کو وجہِ بقاء آپؐ ہیں

صائمہ اسحاق