وہی ہے زاد شفاعت وہی ہے چارۂ غم

 عارفانہ کلام حمد نعت منقبت

وہی ہے زادِ شفاعت، وہی ہے چارۂ غم

جو ایک نامﷺ، سرِ نامۂ عمل ہے رقم

صدائے حرفِ شکستہ کا حُزن لاحاصل

کہ بے طلب ہے کرم بار دستِ خیرِ اتمؐ

وہ حرز گاہِ سکینت میں ہیں قرار نصیب

جنہیں شفاعتِ کُبریٰ سے ہے نوید بہم

وہاں سعئ عبارت طراز خام و خجل

جہاں پہ دَم بھی ثنا گو ہو صورتِ بے دَم

پناہ دارِ زماں ہیں تِرےﷺ نیاز طلب

کُلاہ دارِ جہاں ہیں تِرےؐ حضور میں خم

وہ جن کا مژدۂ *جاءُوک پر ہے دار و مدار

خُدا کا شکر کہ شامل ہیں اُس گروہ میں ہم

قرارِ دیدۂ خاطر ہے تیرے شہر کی خاک

وقارِ مطلعِ طلعت ہیں تیرےﷺ نقشِ قدم

ہم ایسے حیلہ گرانِ سپاس جانتے ہیں

سخن ہے تیریؐ عنایت، ثنا ہے تیراؐ کرم

تؐریﷺ حقیقت نُورِ اِلہٰ صلِ علیٰﷺ

یہ عز و جاہ ہیں تیرا غبارِ راہِ حَشم

علاجِ کرب درونِ دلِ حزیں مقصود

بجز ثنا کبھی ممکن نہیں، خدا کی قسم

مقصود علی شاہ

٭جَاءُوكَ: فَكَيْفَ إِذَا أَصَابَتْهُم مُّصِيبَةٌ بِمَا قَدَّمَتْ أَيْدِيهِمْ ثُمَّ جَاءُوكَ يَحْلِفُونَ بِاللَّهِ إِنْ أَرَدْنَا إِلَّا إِحْسَانًا وَتَوْفِيقًا (٦٢ النساء)