کٹی عشق نبی میں زندگی صدیق اکبر کی

 عارفانہ کلام حمد نعت منقبت

کٹی عشق نبیﷺ میں زندگی صدیق اکبرؓ کی

بنی حق کی رضا ہر اک خوشی صدیق اکبرؓ کی

جہاں میں چار سُو ہے روشنی صدیق اکبرؓ کی

نرالی شمع روشن اک ہوئی صدیق اکبرؓ کی

سرِ عرشِ بریں شہرت ہوئی صدیق اکبرؓ کی

ولی کرتے پھریں سب چاکری صدیق اکبرؓ کی

رفیقِ مصطفیٰﷺ مشہور ہیں بزمِ جہاں میں وہ

نبیﷺ سے ہے مسلّم دوستی، صدیق اکبرؓ کی

مجاہد بھی، وہ غازی بھی، مسلمانوں میں اول بھی

لحد آقاﷺ کے پہلو میں نبیﷺ صدیق اکبرؓ کی

ہُوا ایمان کی رُو سے وہی کامل زمانے میں

ولا قسمت سے جس کو ہے ملی صدیق اکبرؓ کی

صحابہؓ میں کوئی رنجش کبھی تھی اور نہ کِینہ تھا

بڑی تعظیم کرتے تھے علیؑ، صدیق اکبرؓ کی

فرشتوں کی زباں پر ہیں محاسن آپؓ کے جاری

کرے گا کیا کوئی اب، ہمسری صدیق اکبرؓ کی

گزرتے ہیں مِرے شام و سحر آرام سے اب تو

کبھی یادیں نبیﷺ کی ہیں کبھی صدیق اکبرؓ کی

خلیفہ مومنوں کے ہیں نبیﷺ کے بعد وہ، پہلے

منافق ہے رکھے جو دشمنی صدیق اکبرؓ کی

بنے گی حشر میں رومی یہی بخشش کا باعث بھی

خدا کے فضل سے مِدحت کہی صدیق اکبرؓ کی

خالد رومی