سنی سنائی سی تھیں بے وفائیاں کیا کیا

 سُنی سنائی سی تھیں بے وفائیاں کیا کیا​

بنائیں لوگوں نے لیکن کہانیاں کیا کیا​

اسے تو کارِ جہاں سے نہیں مِلی فُرصت​

ہوئی ہیں دل کو مگر بدگُمانیاں کیا کیا​

اُداسی، درد و غم و رنج، ہجر تنہائی​

ملی ہیں پیار کی ہم کو نشانیاں کیا کیا

​بکھیرے گیسُو کبھی، کھنچ لے کبھی آنچل​

کرے ہے بادِ صبا چھیڑ خانیاں کیا کیا​

یہ آئینہ نہیں،۔ احباب ہی بتائیں گے​

ہیں اپنے قول و عمل میں خرابیاں کیا کیا​

مجھے کتابوں میں یا پھر دلوں میں زندہ رکھ​

غُبارِ راہ ہوئیں ورنہ ہستیاں کیا کیا​

ذرا سا رنگِ سخن کیا ظہیر کا بدلا​

چلائی لوگوں نے لفظوں کی برچھیاں کیا کیا

ظہیر قدسی

ظہیرالدین محمد عمر قدسی