کسی لیلٰی نہ کسی ہیر کے ساتھ
رات کاٹی تِری تصویر کے ساتھ
تم کو جب اتنی شکایت ہے تو پھر
باندھ رکھو مجھے زنجیر کے ساتھ
بات یہ ہے کہ کسی ان پڑھ کا
دل بندھا ہے تِری تحریر کے ساتھ
ساتھ میرے بھی وہی ہونا ہے
ہوتا آیا ہے جو کشمیر کے ساتھ
جو مِرا تھا ہی نہیں اُس کے لیے
لڑنا کیا کاتبِ تقدیر کے ساتھ
وقت سے پہلے جہاں جاتے ہیں سب
میں وہیں جاتا ہوں تاخیر کے ساتھ
اپنی خواہش بھی جداگانہ ہے
خُلد میں گھر ہو فقط میر کے ساتھ
عامر عطا
No comments:
Post a Comment