عالم ہے کہ منت کش احسان نبی ہے

 عارفانہ کلام حمد نعت منقبت

عالم ہے کہ منتِ کشِ احسانِ نبیﷺ ہے

کونین پہ چھایا ہوا دامانِ نبیﷺ ہے

اللہُ غنی دیکھیے کیا شانِ نبیﷺ ہے

خلّاقِ دو عالم بھی ثناء خوانِ نبیﷺ ہے

اُمڈا ہوا سر چشمۂ فیضانِ نبیﷺ ہے

کیا منبعِ رحمت درِ ایوانِ نبیﷺ ہے

دل اپنا کھنچا جاتا ہے جو جانبِ منزل

اعجاز کرم گسترِ دامانِ نبیﷺ ہے

ادنیٰ سے اشارے پہ ہوئے چاند کے ٹکڑے

یہ معجزہ، یہ قوتِ ایمانِ نبیﷺ ہے

رضواں تِری جنت کی ضرورت نہیں مجھ کو

صد رشکِ جناں گوشۂ دامانِ نبیﷺ ہے

آوازِ کفِ پا ہے بلالِؓ حبشی کی

کیا شان سرِ عرشِ غُلامانِ نبیﷺ ہے

کافور کیا جس نے زمانے کی سیاہی

وہ روشنیِ شمعِ فروزانِ نبیﷺ ہے

دُشمن ہوئے اخلاقِ شہِ دیںؐ سے مُسلماں

یہ معجزۂ خُلق ہے، یہ شانِ نبیﷺ ہے

آنکھوں میں نظیر اپنے لیے اشک کے دریا

بیٹھا ہوا پیشِ درِ ایوانِ نبیﷺ ہے

نظیر رضوی الہ آبادی

سید محمد نذیر حسن رضوی