دل پہ مجرائی کے اس غم سے نہ کیوں چھائے گھٹا

 عارفانہ کلام حمد نعت منقبت

دل پہ مجرائی کے اس غم سے نہ کیوں چھائے گھٹا

شاہؑ پیاسے رہیں اک بُوند نہ برسائے گھٹا

جن کے ناناﷺ کے سدا سر پہ رہے سایہ فگن

اُس کا تن دُھوپ میں ہو اورنہ گِھر آئے گھٹا

سارے اطفال نباتات کو سیراب کرے

علی اصغرؑ کو پر اک بُوند نہ پہنچائے گھٹا

شہؑ کا خیمہ بھی جلے بیبیاں باہر نکلیں

تو بھی مِینہ اُس کے بجھانے کو نہ برسائے گھٹا

رو دیا بانوؑ نے جب مِینہ کو برستے دیکھا

یاد کر تشنہ دہانوں کو کہا ہائے گھٹا

تیر سی لگتی ہیں اب دھاریں یہ مِینہ کی تیرے

ڈھونڈنے پیاسوں کو اب بانوؑ کدھر جائے گھٹا

دیکھوں جب تجھ کو برستے تو نہ کیوں کر اے وائے

خشک اکبرؑ کا دہن نظروں میں پھر جائے گھٹا

یا اُس پاس چلوں یا وہی آوے میرے پاس

اُس کی تدبیر کوئی اب مجھے بتلائے گھٹا

تُو ہی انصاف سے اب دیکھ تو اکبرؑ کے بغیر

سُونے اس گھر میں بھلا کیوںکر رہا جائے گھٹا

کہتی تھیں بیبیاں سب پیاس سے گھبرا گھبرا

برسے مِینہ خوب سا اے کاش کہیں آ جائے گھٹا

کہا زینبؑ نے کہ ہم پیاسوں کی وہ قسمت ہے

دیکھے گر ہم کو تو آئی ہوئی پھر جائے گھٹا

شہؑ کو عرصہ جو کھنچا کہتی تھی صغراؑ بیمار

اُٹھنے اور بیٹھنے کا زور بھی اب ہائے گھٹا

کس طرح نہ چُھپے ماہِ بتولؑ اے دلگیر

چار جانب سے جو یوں شام کی گِھر آئے گھٹا

دلگیر لکھنوی

لالہ چھنو لال دلگیر