قسم خدا کی بہ لطف و کمال برسا ہے

 عارفانہ کلام حمد نعت منقبت

قسم خُدا کی بہ لُطف و کمال برسا ہے

جہاں بھی نُورِ شہِؐ خُوش خصال برسا ہے

گُلوں میں رنگ و مہک یوں ہی تو نہیں آئے

چمن میں آپﷺ کا حُسن و جمال برسا ہے

درود پڑھتے ہوئے اُنؐ کا ذکر کرتے ہوئے

ہر ایک دل پہ کرم بے مثال برسا ہے

مدینہ پاک ہی واحد زمیں پہ بستی ہے

جہاں کبھی بھی نہ رنج و ملال برسا ہے

نبیؐ کا اِسم جو چُوما تو نعت ہونے لگی

یہ کام کرنے سے حُسنِ خیال برسا ہے

ہمارے نامۂ اعمال کی سیاہی دُھلی

ہماری آنکھ سے جوں جوں ملال برسا ہے

بس ایک دن ہی سجائی تھی نعت کی محفل

فدا پہ ابرِ کرم سارا سال برسا ہے

صدام فدا