عارفانہ کلام حمد نعت منقبت
ایسی قدرت نے تیری صورت سنواری یا رسولﷺ
دونوں عالم کو ہوئی یہ شکل پیاری یا رسولﷺ
ہے چمک تیرے دُرِ دَنداں میں جیسی یا نبیﷺ
موتیوں میں کب ہے ایسی آبداری یا رسولﷺ
اے تیری رِفعت کہ تیرے رب نے کی تجھ کو عطا
تاجدارانِ جہاں کی تاجداری یا رسولﷺ
ہے کہاں مادر کو اُلفت اس قدر فرزند سے
تجھ کو ہے اُمت کی جتنی پاسداری یا رسولﷺ
خوابِ غفلت میں پڑے دن رات ہم سوتے رہے
تم نے کی غم میں ہمارے اشکباری یا رسولﷺ
رات کاٹی ہم نے سو کر دن گُزارا لہو میں
تم نے روتے روتے ساری شب گُزاری یا رسولﷺ
وقت پیدائش شب معراج مرقد میں کہیں
تم نے اُمت کی نہ چھوڑی غمگساری یا رسولﷺ
عاصیوں کی مُلحِدوں کی مُشرک و کفار کی
تم نے کی دُنیا میں سب کی پردہ داری یا رسولﷺ
حق کے پیارے آپ اور اُمت ہے پیاری آپ کو
اس لیے حق کو ہوئی اُمت بھی پیاری یا رسولﷺ
ایک قطرہ ہو عطا جامِ مئے عرفان سے
دُور ہو دل سے مِرے غفلت شعاری یا رسولﷺ
اس کو کہتے ہیں محبت حیدرِ کرارؑ نے
تیرے سونے پر نمازِ عصر واری یا رسولﷺ
زندگی بھر بعد مردن روزِ محشر تک رہے
تیرے در سے مجھ کو حاصل ہمکناری یا رسولﷺ
شانِ رحمت جوش پر آئی چُھڑایا قید سے
بے کلی کے ساتھ جب ہرنی پکاری یا رسولﷺ
کوئی بھی دُنیا و عُقبیٰ میں نہیں پُرسانِ حال
آس ہے ہم عاصیوں کو بس تمہاری یا رسولﷺ
ہر مصیبت سے بچایا تیرے نامِ پاکﷺ نے
تیری رحمت نے مِری حالت سنواری یا رسولﷺ
گر خُدا چاہے تو اُٹھ جائے گا پردہ قبر سے
مر کے بھی دیکھا کروں گا شکل پیاری یا رسولﷺ
کعبۂ دل میں مدینہ اور مدینہ میں ہو تم
میرے سینے میں بھی ہے تُربت تمہاری یا رسولﷺ
اس لیے عشّاق کے سینوں میں ہو تم جلوہ گر
سر جُھکا کر دیکھ لیں صُورت تمہاری یا رسولﷺ
یا حبیب اللہﷺ یاغوثُ الوریٰﷺ جس دم کہا
نجدیوں کے لگ گئی دل پر کٹاری یا رسولﷺ
ہے فقط اتنی تمنّا اے جمیل قادری
ہو تِری خالص محبت دل میں ساری یا رسولﷺ
جمیل رضوی قادری
No comments:
Post a Comment