عارفانہ کلام حمد نعت منقبت
قید سے چُھوٹ کے جب سیدِ سجادؑ آئے
اور سب اہلِ حرم با دلِ ناشاد آئے
باپ اور بھائی جو بیمار کو واں یاد آئے
قبر پر شہؑ کی یہ کرتے ہوئے فریاد آئے
اے پدر! طُول کھنچا اب میری بیماری کو
اُٹھ کے چھاتی سے لگا لیجیے آزاری کو
آپ سے اپنی اسیری کی کہوں کیا حالت
کھینچا کھینچا میں پھرا اے پدرِ نیک صفات
قید خانے میں عجب طور کے دیکھے حالات
آپ سے چھوٹ کے نہ میں چین سے سویا ایک رات
آنکھ گر حالتِ غش میں کبھی کھل جاتی تھی
کان میں نالۂ زہراؑ کی صدا آتی تھی
اس قدر پردہ نشینوں کو ستاتے تھے شریر
کوئی روتی تھی تو دکھلاتے تھے نیزہ بے پیر
نالہ کر سکتا نہ تھا کوئی سوائے زنجیر
سفرِ کے ایذاء کی کروں کیا تقریر
ایک تو طوق سے گردن کو گرانباری تھی
دوسرے پاؤں کی زنجیر بہت بھاری تھی
دلگیر لکھنوی
لالہ چھنو لال دلگیر
No comments:
Post a Comment