وہ گھر وہ کوچہ وہ قریہ مکان رحمت ہے

 عارفانہ کلام حمد نعت منقبت

وہ گھر وہ کوچہ وہ قریہ مکانِ رحمت ہے

رہا جو آپﷺ کا مسکن جہانِ رحمت ہے

پڑھا جو آپﷺ سے کلمہ نشانِ رحمت ہے

’’آپﷺ کا اسوہ جہانِ رحمت ہے‘‘

حضور! آپؐ کے دل پر خدا کا ہے احساں

حضور! آپؐ کے لب پر بیانِ رحمت ہے

غدیرِ خم پہ یہ آقاﷺ نے ہم سے فرمایا

علیؑ زمانے کا مولا بھی جانِ رحمت ہے

اگر بلالؓ نہ دیتے اذاں نہ ہوتی سحر

بلالؓ نے جو سُنائی اذانِ رحمت ہے

کڑکتی دُھوپ میں پرچم کُھلا ہے محشر میں

چلو وہاں پہ جہاں سائبانِ رحمت ہے

وہ بند مُٹھی میں کنکر کو دے کے حکمِِ خُدا

کلام جس نے کرایا زبانِ رحمت ہے

خُدا نے سایہ نہ قائم زمیں پہ پڑنے دیا

قدم نہ آئے کسی کا یہ شانِ رحمت ہے

سید حبدار قائم

سید حبدار حسین