عارفانہ کلام حمد نعت منقبت
شان عالی آپ کی رب کے پیمبر یا نبیﷺ
آپﷺ نبیوں میں بڑے محبوبِ داور یا نبیؐ
رات دنِ روضے کا پھیرا میں لگاتا جھوم کر
کاش ہوتا میں مدینے کا کبوتر یا نبیؐﷺ
ہند سے پرواز کرتا میں مدینے کی طرف
میرے بازو میں جو لگ جاتا کبھی پر یا نبیؐ
سبز گنبد کا کیا دیدار جب سے خواب میں
میری آنکھوں سے نہیں ہٹتا وہ منظر یا نبیؐ
ہر گھڑی کرتا نظارہ گنبدِ خضریٰ کا میں
شہرِ طیبہ میں جو ہوتا میرا بھی گھر یا نبیؐ
دور رہ کر آپ کے در سے نہ مر جاؤں کہیں
فکر جو مجھ کو ستاتی ہے یہ اکثر یا نبیؐ
معجزوں میں معجزہ یہ بھی ہے اک سرکارؐ کا
کہہ اٹھا بو جہل کی مٹّھی میں کنکر یا نبیؐ
جو کہ ہے حسنینؑ کا بابا خدا کا شیر ہے
اُس کے آگے کیا ہے پھر یہ بابِ خیبر یا نبیؐ
میں کرونگا حشر میں سرکارؐ سے یہ التماس
دستِ رحمت سے پلائیں آبِ کوثر یا نبیؐ
اِس لٸے میلاد کی محفل سجاتا ہوں سدا
آپ آتے ہیں مدینے سے مرے گھر یا نبیؐ
آپ جب بخشش کے ضامن بن کے آئے ہیں حضور
پھر ستائے کیسے مجھ کو خوفِ محشر یا نبیؐ
ہے دعا میری مِرا مدفن بقیعِ پاک ہو
روح نکلے سامنے ہو آپ کا در یا نبیؐ
آپ کی نعتوں کے صدقے ہی مری پہچان ہے
ورنہ میں ہوں ایک معمولی سُخنور یا نبیؐ
ماہِ رمضاں اور مدینے کا صحن افطاریاں
ہو عطا کو یہ کبھی موقع میسر یا نبیؐ
عامر عطا
No comments:
Post a Comment