اصلاح ملک کا نعرہ لگاتا رہا کوئی

 اپنے ملک میں

اصلاح ملک کا نعرہ لگاتا رہا کوئی

مذہب کی ڈفلی لے کے بجاتا رہا کوئی

بن کر مداری سانپ نچاتا رہا کوئی

اور مال لُوٹ لٗوٹ کے کھاتا رہا کوئی

اپنے وطن میں سب کا یہی حال ہو گیا

ایمان داریوں کا یہاں کال ہو گیا

سادھو ہوں یا کہ سادھوی کرتے ہیں یہ کرم

سازش رچیں گے کیسے کہاں رکھا جائے بم

رہبر و مولوی بھی نہیں اس سے کوئی کم

پیسے کی چاہ توڑتی ہے ان کے سب بھرم

دولت کی ان کے پاس بہت ریل پیل ہے

دین و سیاست ان کے لیے صرف کھیل ہے

بھگوا، ہرا، سفید کے چکر میں پھانس کر

لوگوں کا ڈال دیتے ہیں یہ اوکھلی میں سر

رہتے ہیں سیکورٹی میں خُود شام و سحر

مُرغا اُڑائیں خُود، ہمیں دیتے ہیں صرف پر

کرتوت ان کے دیکھ کے پھٹ جاتی ہے زمیں

لیکن کمال ہے یہ سزا پاتے ہی نہیں

مسلم ہیں یہ نہ ہندو نہ سِکھ ہیں یہ سر پھرے

ان کو غرض نہیں ہے جیے کوئی یا مرے

غدارِ ملک جتنے بھی ہیں ملک میں بھرے

آتے ہیں ان کے واسطے ہیمنت کرکرے

کالسکر و حیمد یا اشفاق و کامٹے

کتنے جوان ملک کی خدمت میں مر مِٹے

قانون جس جگہ ذرا بے بس دِکھائی دے

جب جُھوٹ کی سوا نہ کہیں کچھ سُنائی دے

ایسے میں کس کو کون کہاں تک دُہائی دے

اک راستہ ظہیر یہی پھر دِکھائی دے

طاقت عوام ایسے بتانے لگے ہیں اب

دہشتگردوں پہ جوتے چلانے لگے ہیں اب

ظہیر قدسی

ظہیرالدین محمد عمر قدسی