مدینہ شہر کے مالک مجھے خاک مدینہ دے

 عارفانہ کلام حمد نعت منقبت

مدینہ شہر کے مالک مجھے خاکِ مدینہ دے

لگا لوں خاک پلکوں سے مجھے ایسا قرینہ دے

بچھا کر اپنے ہاتھوں پر میں پلکوں سے اسے چُوموں

حِرا کے غار میں موجود پوشیدہ دفینہ دے

جہاں خُوشرو کے قدموں کا ابھی تک لمس ہے باقی

وہاں کے سنگ جوہر ہیں مجھے ان سے نگینہ دے

مجھے لفظوں کی رم جھم سے منور دل عطا کر دے

ہو جس میں مصطفیٰﷺ کا نور شامل وہ خزینہ دے

فرشتوں کو سُنانی ہے یہ مدحت اپنے احمدﷺ کی

رسائی آسماں تک ہو مجھے نوری تو زینہ دے

اِدھر سے دیکھ لے خضریٰ، اُدھر سے آسماں جائے

مجھے مِدحت نگاری سے تو ایسی چشمِ بینا دے

مجھے الماس کی دھرتی پہ اک یاقوت کی تسبیح

سے آقاﷺ آقاﷺ پڑھنے کے لیے پورا مہینہ دے

مدینے کی طلب کرتے تھکن سے چُور رہتا ہوں

سکوں دے اپنے روضے سے مجھے ہر پل سکینہ دے

سمندر ہے کدورت کا، کہیں فرقہ پرستی کا

مجھے آلِ عباؑ والا سہارا دے، سفینہ دے

یہی منزل مسلماں کی، یہی قائم کی حسرت ہے

نہیں ہیں مصطفیٰؐ جس میں وہ ہستی تو کبھی نا دے

سید حبدار قائم

سید حبدار حسین