چشم کرم حضور کی فیضان نعت ہے

 عارفانہ کلام حمد نعت منقبت

چشم کرم حضورؐ کی فیضانِ نعت ہے

رزقِ سخن مِلا جو یہ احسانِ نعت ہے

لِکھی ثناء تو ہو گئے الفاظ نُور نُور

اور جگمگا اُٹھا میرا دِیوانِ نعت ہے

مِدحت کے پُھول بے بہا دامن میں آ گئے

کِتنا وسیع اُنﷺ کا گُلستانِ نعت ہے

کچھ سِسکیاں ہیں اشک ہیں کچھ درد اور دروُد

اتنا سا پاس میرے بھی سامانِ نعت ہے

عشقِ نبیؐ میں ڈُوب کے جو بھی کرے ثناء

وہ ہی عظیم ہے، وہی سلطانِ نعت ہے

غارِ حِرا کا نُور ہی آنکھوں میں ہو بسا

پھر خامہ بھی لِکھے گا جو شایانِ نعت ہے

دل میں سجی ہو یاد جو آقا کریمﷺ کی

"ہر شعبۂ حیات میں اِمکانِ نعت ہے"

آئی بہار نعتوں کی کلیاں چٹک گئیں

اے ناؔز! تیرے قلب پہ بارانِ نعت ہے

صفیہ ناز