سلام اس پر کہ جو محبوب رب العالمیں ہو کر

 عارفانہ کلام حمد نعت منقبت

سلام اُسؐ پر کہ جو محبوبِ رب العالمیں ہو کر

دِکھانے منزلِ حق آیا جو حق الیقیں ہو کر

تصور صاحبِ لولاکؐ کا دل میں مکیں ہو کر

دِکھاتا ہے جو منزل رہبرِ راہِ یقیں ہو کر

سلام اُسؐ پر کہ جس کی انگلیوں سے چشمے بہ نکلے

کِیا سیراب سب کو رحمت اللعالمیںﷺ ہو کر

سلام اُسؐ پر کہ جس نے کر دیا ہے شادماں اُس کو

جو اُسؐ کی بزم میں آیا کوئی اندوہ گیں ہو کر

سلام اُسؐ پر تصدق جان و دل اُس مہر عرفاں پر

ہوا کونین میں جو آشکارا نیریں ہو کر

سلام اُسؐ پر نہایت خندہ پیشانی سے پیش آیا

جو اُسؐ کے سامنے آیا کوئی چیں بہ جبیں ہو کر

سلام اُسِ پر درود اُسؐ پر وہ سرتاجِ رُسل جس نے

غریبوں کے دلوں میں گھر کیا دُرِّ ثمیں ہو کر

جو محبوبِﷺ خدا ہے نازشِ خلاقِ عالم ہے

اُسیؐ کا نور چمکا آفتابِ مُرسلیںﷺ ہو کر

خدا نے یہ شرف بخشا نظیر اِک فخرِ انساں کو

نہ پہنچے لامکان تک دیکھیے، روح الامیںؑ ہو کر

نظیر رضوی الہ آبادی

سید محمد نذیر حسن رضوی