گل امید ہی کھلا دو تم اک بار مسکرا دو

 اس سے پہلے ہی کہ مُرجھائے گُلزارِ محبت

اس سے پہلے ہی کہ مر جائے فشارِ الفت

اس سے پہلے ہی کہ اُمڈ آئے نزارِ نفرت

اس سے پہلے ہی کہ لڑکھڑائے دیدارِ چاہت

گُلِ امید ہی کِھلا دو

تم اک بار مُسکرا دو

مزدور کی کھولی جلنے سے پہلے اُٹھو بھی

کسان کی جھولی پھیلنے سے پہلے اُٹھو بھی

محکوم کی بولی بِکنے سے پہلے اُٹھو بھی

مظلوم کی کھٹولی اُٹھنے سے پہلے اُٹھو بھی

خاموشیوں کو جگا دو

مل کے غموں کو سزا دو

قبیلوں کی تفریقِ تقسیم کے بُت توڑو بھی

عقیدوں کی نفرت کے سارے بھوت پھوڑو بھی

احترامِ انسانیت کے خلاف تابوت توڑو بھی

کُچلے ہوئے طبقے کی آپسی محبت جوڑو بھی

اتحادِ شعوری علم لہرا دو

سحرِ نو کی سب کو صدا دو

جو ظُلم کے خلاف نہیں وہ ظالم کا حامی ہے

جو خلافِ غاصب نہ اُٹھے وہ مظالم کا حامی ہے

جو مقتل کے خلاف نہیں کُہنہ نظام کا حامی ہے

جو نہ اُٹھے خلافِ جبر وہ تقسیم کا حامی ہے

مل کے لال پرچم اُٹھا لو

نئی سحر کی محبت جگا دو

جہاں سب کا مذہب سب کے لیے قابلِ احترام ہو

جہاں سب کا قبیلا سب کے لیے حاصلِ احترام ہو

جہاں سب کے لیے ضرورتوں کا حصولِ احترام ہو

جہاں نغماتِ آزادی و امن کا فاضل اہتمام ہو

شبِ سیاہ کو اب مِٹا دو

نئے سماج کا ساز بجا دو

امتیاز فہیم