یہ کار ریاضت بھی ہے خاموش تلاوت

 یہ کارِ ریاضت بھی ہے خاموش تلاوت

خاموش محبت بھی ہے خاموش تلاوت

اس دل کا کوئی زخم اِدھر سے نہ اُدھر ہو

احساسِ امانت بھی ہے خاموش تلاوت 

خاموش صحیفوں کی طرح اس کی ہے قامت 

آیات سی صورت بھی ہے خاموش تلاوت

کرتے ہیں دوانے بھی ہمہ وقت قِرأت

یہ طرزِ عقیدت بھی ہے خاموش تلاوت 

ہوتی ہے اذاں پیار کی مسجد میں برابر 

صف بندئ حسرت بھی ہے خاموش تلاوت 

کعبہ ہو کلیسا ہو کہ بت خانہ و مندر 

صوفی کی طریقت بھی ہے خاموش تلاوت

احسان مجھے عشق سے باز آنا نہیں ہے

مجنوں کی روایت بھی ہے خاموش تلاوت

ریاض احمد احسان