محمد کی گلی ہے اور ہم ہیں

 عارفانہ کلام حمد نعت منقبت

محمدﷺ کی گلی ہے اور ہم ہیں

عروجِ زندگی ہے اور ہم ہیں

جمی ہیں گنبدِ خضریٰ پر نظریں

سرورِ سرمدی ہے اور ہم ہیں

درِ حضرتﷺ پر اپنی شان دیکھو

وفا کی چاندنی ہے اور ہم ہیں

چھڑا ہے قصۂ معراجِ سرورﷺ

کمالِ آدمی ہے اور ہم ہیں

شہہ لولاکﷺ کی بخشش تو دیکھو

شعورِ زندگی ہے اور ہم ہیں

ادھر بھی اک نظر ساقیِ کوثرﷺ

وفور تشنگی ہے اور ہم ہیں

بہر منزل بہر جادہ بہر گام

رسولِ ہاشمیﷺ ہے اور ہم ہیں

کہیں نظریں کہیں منزل کہیں دل

یہ مستانہ روی ہے اور ہم ہیں

تصور رات دن کہتا ہے عارف

دیارِ سیدیﷺ ہے اور ہم ہیں

عارف اکبرآبادی