عارفانہ کلام حمد نعت منقبت
قدِ موزونِ حضرت میں ہے جلوہ کس قیامت کا
فرشتوں کو یہاں دعویٰ نہیں ہے استقامت کا
ہوا ہے شور عالم میں بپا کس کی ملاحت کا
کہ قصہ بے نمک ہے یوسفِ مصری کی صورت کا
تڑپ جاتا ہے دل پہلو میں یاد آتا ہے جب روضہ
مدینے کی جدائی سامنا ہے مجھ کو آفت کا
جدھر آنکھیں اٹھیں پیشِ نظر ہے صورتِ حضرت
تماشہ دیکھتے ہیں ہم اسی کثرت میں وحدت کا
ہر اک کوچہ وہاں کا غیرتِ وادئ ایمن ہے
مدینے میں ہے جلوہ ہر طرف شمعِ نبوت کا
خیالِ روئے حضرت میں نہیں کچھ سوجھتا ہم کو
جمالِ پاکﷺ نے آئینہ دکھلایا ہے حیرت کا
نہیں کٹتی کسی پہلو شبِ ہجرِ نبیﷺ اکبر
دکھایا انتظار اس صبح نے صبحِ قیامت کا
شاہ اکبر داناپوری
No comments:
Post a Comment