چین پاؤں گا بس یہیں پر میں
ہونٹ رکھوں تِری جبیں پر میں
اس کے جیسا کوئی مِلا کب تھا
کیسے مرتا نہ اُس حسیں پر میں
ایک دن لوٹ کے وہ آئے گا
جی رہا ہوں اِسی یقیں پر میں
اُڑ بھی سکتا تھا آسمانوں پر
پاؤں رکھتا اگر زمیں پر میں
اُس نے کھولا قفس کا دروازہ
اُڑ سکا اب تلک نہیں پر میں
شہر ہو یا ہو کوئی ویرانہ
تُو جہاں ہو رہوں وہیں پر میں
کھول رکھتا ہوں اپنے دروازے
بوجھ بنتا نہیں مکیں پر میں
اُس نے شہزاد ہاں سُنی پھر بھی
زور دیتا رہا "نہیں" پر میں
شہزاد مغل عجمی
No comments:
Post a Comment