درود ان پر کہ دست اقدس کو چھو گیا جو وہ چہرہ چمکا

 عارفانہ کلام حمد نعت منقبت

درود ان پر کہ دستِ اقدس کو چھُو گیا جو وہ چہرہ چمکا

سلام ان پر کہ چھُو کے ان کے قدم کو رستہ ہر ایک مہکا

درود ان پر کہ دستِ اقدس سے پانچ چشمے ہوئے تھے جاری

سلام ان پر کہ سیر ان سے ہوئی صحابہؓ کی فوج ساری

درود ان پر کہ جن کی آنکھیں بغیر سُرمہ کے سُرمگیں تھیں

سلام ان پر کہ وہ سفیدی میں سُرخ ڈوروں سے کیا حسیں تھیں

درود ان پر بقولِ حضرت علیؑ کشادہ سیہ تھیں آنکھیں

سلام ان پر حسین آنکھوں پہ پہرہ دیتی دراز پلکیں

درود ان پر کہ رات میں بھی سحر کی مانند دیکھتے تھے

سلام ان پر نمازیوں کے خشوع مخفی نہیں تھے ان سے

درود ان پر ہے شان ان کی وہ حق نما ہیں وہ حق نگر ہیں

سلام ان پر بقولِ قرآں انہی کے ما زاغ کے بصر ہیں

درود ان پر کمان ابرو سے جب وہ چھٹتے تھے تیرِ مژگاں

سلام ان پر دلوں کے پنچھی مچل کے ہوتے تھے ان پہ قرباں

درود ان پر کہ ابروؤں کے میان ہوتی حسیں رفعت

سلام ان پر جلال میں جب کبھی ابھرتی رگِ جلالت

درود ان پر کہ ماہِ تاباں سے بڑھ کے روشن جبیں کُشادہ

سلام ان پر کہ جیسے روشن وفورِ شب میں چراغِ جادہ

درود ان پر نہیں پسینہ، جبیں پہ جیسے برستی بدلی

سلام ان پر وہ کوندی بجلی پکار اٹھا کبیر ھزلی

درود ان پر جبیں کشادہ، کمان ابرو، دراز مژگاں

سلام ان پر کہ جگمگاتی وہ اونچی بینی تھی نُور افشاں

درود ان پر کہ سہل و ابیض اسیل ان کے چمکتے عارض

سلام ان پر بوقتِ غصّہ انار جیسے دمکتے عارض

درود ان پر کہ ریش انور کا چاند چہرے کے گرد ہالہ

سلام ان پر دہن تھا دریا کے گرد سبزے کا اک حوالہ

درود ان پر کہ پتلی پتلی گلِ مقدّس کی سُرخ پتیاں

سلام ان پر لبوں سے جھڑتی ٹھہر ٹھہر کے وہ میٹھی بتیاں

درود ان پر وہ مُسکرائیں تو پُھول کلیوں میں حُسن بھر دیں

سلام ان پر کہ وہ جو بولیں تو گُفتگو میں نگینے جڑ دیں

مقصود علی شاہ