عارفانہ کلام حمد نعت منقبت
جب مصطفیٰؐ کے شہر میں چھاتی ہے چاندنی
صلِّ علیٰﷺ کا نغمہ سناتی ہے چاندنی
سینہ مِرا مدینہ بناتی ہے چاندنی
عشقِ نبیؐ کی جوت جگاتی ہے چاندنی
ممکن نہیں کہ چاند میں ہو ایسی روشنی
دنداں سے ان کے چھن کے جو آتی ہے چاندنی
ماہِ عربﷺ کے چہرۂ زیبا کو دیکھ کر
شرم و حیا سے منہ کو چھپاتی ہے چاندنی
مت کر مِرا موازنہ گنبد کے نور سے
پیغام یہ جہاں کو بتاتی ہے چاندنی
روشن جہاں کو نور سے کر دينے کے لیے
خیرات تیرے نور سے پاتی ہے چاندنی
شہرِ رسول پاکؐ کے جلووں کو دیکھ کر
سو بار اپنی جان لُٹاتی ہے چاندنی
فردوس اس کو دیکھے بھلا کیوں نہ بار بار
دیدار جب کہ روضے کا پاتی ہے چاندنی
فردوس فاطمہ اشرفی
No comments:
Post a Comment