درد کی اس دل میں بھی تصویر کھینچ

 درد کی اس دل میں بھی تصویر کھینچ

کھینچ اور اک آہِ پُر تاثیر کھینچ

اشکِ خُونیں سے سرِ دامن کوئی

غم کی جیتی جاگتی تصویر کھینچ

اس سے وابستہ ہے میری زندگی

یوں نہ میرے دل سے اپنا تیر کھینچ

زندگی کی تو ہیں تصویریں بہت

اے مصور! موت کی تصویر کھینچ

جان آ جائے دلِ مجروح میں

اپنے ترکش سے اک ایسا تیر کھینچ

شامِ غم آہوں کو کچھ حاصل نہیں

صبح دم اک نالۂ دلگیر کھینچ

سخت جانوں کا نہیں ہے قتل کھیل

یوں نہ دستِ ناز سے شمشیر کھینچ 

باز آ جذبِ تصور! باز آ

یوں نہ اب تصویر سے تصویر کھینچ 

یوں گریباں گیر کب تک اے حباب

بڑھ کے اک دن دامنِ تقدیر کھینچ

سید حباب ترمذی