کسی کا یوں تو ہوا کون عمر بھر پھر بھی ​

کسی کا یوں تو ہُوا کون عمر بھر، پھر بھی ​

یہ حسن وعشق تو دھوکا ہے سب، مگر پھر بھی​

ہزار بار زمانہ ۔۔۔ اِدھر سے گزرا ہے ​

نئی نئی سی ہے کچھ، تیری رہگزر پھر بھی​

خوشا اشارہٴ پیہم، زہے سکوتِ نظر​

دراز ہو کے فسانہ ہے مختصر پھر بھی ​

جھپک رہی ہے زمان و مکان کی آنکھیں​

مگر ہے قافلہ، آمادۂ سفر پھر بھی ​

شبِ فِراق سے آگے ہے آج میری نظر​

کہ کٹ ہی جائے گی یہ شامِ بے سحر پھر بھی​

کہیں یہی تو نہیں کاشفِ حیات و ممات​

یہ حسن وعشق بظاہر ہیں بے خبر پھر بھی​

لٹا ہوا چمنِ عشق ہے، نگاہوں کو ​

دِکھا گیا وہی کیا کیا گل و ثمر پھر بھی​

خراب ہو کے بھی سوچا کیے تِرے مہجور ​

یہی کہ تیری نظر ہے تِری نظر پھر بھی​

ہو بے نیازِ اثر بھی کبھی تِری مٹّی​

وہ کیمیا ہی سہی، رہ گئی کسر پھر بھی​

لپٹ گیا تِرا دیوانہ گرچہ منزل سے ​

اڑی اڑی سی ہے کچھ خاکِ رہگزر پھر بھی​

تِری نِگاہ سے بچنے میں عمر گزری ہے ​

اتر گیا رگِ جاں میں یہ نیشتر پھر بھی​

غمِ فراق کے کُشتوں کا حشر کیا ہو گا​

یہ شامِ ہجر تو ہو جائے گی سحر پھر بھی​

فنا بھی ہو کے گرانبارئ حیات نہ پوچھ ​

اٹھائے اٹھ نہیں سکتا یہ دردِ سر پھر بھی​

سِتم کے رنگ ہیں ہر اِلتفاتِ پنہاں میں​

کرم نما ہیں تِرے زور سر بسر پھر بھی​

خطا معاف! تِرا عفْو بھی ہے مثلِ سزا​

تِری سزا میں ہے اک شانِ درگزر پھر بھی​

اگرچہ بے خودئ عشق کو زمانہ ہوا  ​

فراقؔ، کرتی رہی کام وہ نظر پھر بھی

​فراق گورکھپوری