عشق کی مایوسیوں میں سوز پنہاں کچھ نہیں

عشق کی مایوسیوں میں سوز پنہاں کچھ نہیں

اس ہوا میں یہ چراغ زیر داماں کچھ نہیں

کیا ہے دیکھو حسرتِ سیرِ گلستاں کچھ نہیں

کچھ نہیں اے ساکنانِ کنج زنداں! کچھ نہیں 

جینے والے جی رہے ہیں اور ہی عالم میں اب

دوستو! طولِ غمِ شبہائے ہجراں کچھ نہیں

عشق کی ہے خود نمائی عشق کی آشفتگی

روئے تاباں کچھ نہیں، زلفِ پریشاں کچھ نہیں

درد کے مارے ہوئے کل روتے روتے ہنس پڑے

پھر کہو گے عشق کی تاثیر پنہاں کچھ نہیں

آنکھ والے دیکھ لیں میرے سیہ خانے کی سیر

ماہِ تاباں کچھ نہیں، مہرِ درخشاں کچھ نہیں

ایک ہو جائے نہ جب تک سرحدِ شوقِ جنوں

ایک ہو کر چاکِ دامان و گریباں کچھ نہیں

یاد آ ہی جاتی ہے اکثر ۔۔۔ دلِ برباد کی

یوں تو سچ ہے چند ذرات پریشاں کچھ نہیں

کاش اپنے ہجر سے بے تاب ہوتے اے فراقؔ

دوسرے کے واسطے حالِ پریشاں کچھ نہیں

فراق گورکھپوری