ان سے کچھ وصل کا ذکر اب نہيں لانا اچھا

ان سے کچھ وصل کا ذکر اب نہيں لانا اچھا

وہ جو کچھ کہيں تو تم بھی کہو جانا اچھا​

تم نے دشمن ہے جو اپنا ہميں جانا اچھا

يارِ نادان سے تو ہے دشمنِ دانا اچھا​

پھول گل مہندی کے لا لا نہ ہاتھوں ميں ملو

خونِ عاشق نہيں مرقد پہ بہانا اچھا​

طائرِ جاں کے سوا کوچۂ جاناں کی طرف

نامہ بر کون ہے جو کيجئے روانہ اچھا​

طاقِ ابرو کے تصور ميں دل کھينچ نہ آہ

سمتِ کعبہ پر نہيں تير لگانا اچھا​

بدگمان ديکھو کچھ اس ميں بھی نہ ڈاليں رخنہ

روزنِ در سے نہيں آنکھ لڑانا اچھا​

آتشِ عشق ہے سينہ ميں دبی ديکھ اے چشم 

اب نہيں دامنِ مژگان کا بلانا اچھا​

بيٹھ رہ کر کے قناعت کہ بشکل مہِ نو

چھوڑے آدھی تو نہيں ساری کو جانا اچھا​

مرغِ دل نِگہِ يار سے پوچھا اڑ کر

پھر بھی کہنا کہ لگاتے ہيں نشانہ اچھا​

ياں تو دم ميں نہيں دم اور وہ ليے تيغِ دو دم

کہتے ہيں، ديکھو نہيں دم کا چرانا اچھا​

طرہ شمشاد دکھاتا ہے تری زلفوں کو 

لاوا رہ کہ يہی اس کو ہے شانہ اچھا ​

ساقيا! ابر ہے آيا تو بڑھا خم پر ہاتھ

کہ گھٹا ميں نہيں ہمت کا گھٹانا اچھا​

جل کے گر قطرۂ خون دل کا ہوا اشک آلود

تو نہيں نيمچۂ مژگاں سے گرانا اچھا ​

گردشِ عمر ميں تسبیحِ سليمانی کا 

آج ايک ہاتھ لگا ہے مِرے دانہ اچھا​

سامنے يار کے اے ذوقؔ! بہانا آنسو

ہے تو چاہت کے جتانے کو بہانہ اچھا​

ابراہیم ذوق