کیا توقع کرے کوئی ہم سے

کیا توقع کرے کوئی ہم سے

اک محبت نہ ہو سکی ہم سے

بات اس کم سخن کی کرتے ہیں

چھِن نہ جائے سخن وری ہم سے

باغ ایسا اتر گیا دل میں

پھر وہ کھڑکی نہیں کھلی ہم سے

اب کہاں ہے وہ خواب سی صورت

اس میں جو بات تھی، وہ تھی ہم سے

چاک دل کا بہت نمایاں ہے

کون سیکھے رفوگری ہم سے

ہمسفر تھا غبارِ راہِ فنا

ابر سمجھے جسے کئی ہم سے

دشتِ امکاں میں دور تک عادلؔ

فصلِ کُن ہے ہری بھری ہم سے

ذوالفقار عادل