یہ ادا آپ میں سرکار کہاں تھی پہلے

یہ ادا آپ میں سرکار کہاں تھی پہلے

یہ نظر آپ کی تلوار کہاں تھی پہلے

حشرِ ساماں تِری رفتار کہاں تھی پہلے 

تِرے پائل میں یہ جھنکار کہاں تھی پہلے

خَلق، یوسُف کی خریدار کہاں تھی پہلے 

مِصر میں گرمئ بازار کہاں تھی پہلے

یہ تو جلوؤں کا تصرف ہے تمہارے ورنہ 

انجمن مطلعِ انوار کہاں تھی پہلے

فیض ہے مست نگاہی کا تری اے ساقی 

زندگی ورنہ یہ سرشار کہاں تھی پہلے

قد کے بڑھتے ہی بڑھی جورو جفا کی عادت 

تجھ میں یہ بات ستمگار کہاں تھی پہلے

یہ کرم تو ہے ترے چاہِ ذقن کا ورنہ 

زندگی تشنۂ دیدار کہاں تھی پہلے

یہ تو ہے اس بتِ کافر کی نگاہوں کا فُسوں 

ورنہ رَگ رَگ مِری زنار کہاں تھی پہلے

کُشتۂ گردشِ دوراں ہوں میں اب اے جوہر 

زندگی باعثِ آزار کہاں تھی پہلے

جوہر دیوبندی