اے شیخ و گبر سبحہ و زنار توڑیے​

اے شیخ و گبر سبحہ و زنار توڑئیے​

پر دل کسی بشر کا نہ زِنہار توڑئیے​

پیرِ مغاں کو جی میں ہے کعبہ بنائیے​

بت نشۂ شراب میں دو چار توڑئیے​

چہرے پہ خط ہوا ہے برنگِ سپر سیاہ​

بس اب تو اپنے ناز کی تلوار توڑئیے​

برسوں دہانِ زخم سے ہنستے رہے ہیں ہم​

اک عمر رونے کا بھی نہ اب تار توڑئیے​

آیا مہِ صیام علی الرغمِ محتسب​

روزے شراب سے سرِ بازار توڑئیے​

ہم وحشیوں کے پاؤں کو کانٹوں سے کیا ہے انس​

ہاتھوں سے بھی گلوں کے عوض خار توڑئیے​

ہے کس کو فہم زمزمہ ہائے صریر کا​

بس عندلیبِ کلک کی منقار توڑئیے​

ہاروں کی ہم سے دل شکنی ہو سکے کہاں​

یاں پاس ہے نہ خاطرِ اغیار توڑئیے​

خرمہرے سے بھی گوہرِ مضموں کی کم ہے قدر​

وہ وقت ہے کہ کلکِ گہربار توڑئیے​

ہم جورِ چشمِ یار سے دم مارتے نہیں​

یعنی روا ہے کب دلِ بیمار توڑئیے​

یاں دردِ سر خمار سے ہے واں دکان بند​

ٹکرا کے سر کو اب درِ خمار توڑئیے​

ٹکراؤں واں جو سر تو وہ کہتا ہے کیا مجھے​

صاحب نہ مجھ غریب کی دیوار توڑئیے​

دم توڑنا ہے فرقتِ جاناں میں اپنا کام​

کچھ کوہکن نہیں ہیں جو کہسار توڑئیے​

ناسخؔ بقول افصحِ ہندوستاں کبھی​

زاہد کا دل نہ خانۂ خمار توڑئیے​

امام بخش ناسخ