پرسشِ غم کا تقاضا ہے نہ قربت کی طلب
دشمنِ جاں سے بھلا کیوں ہو مروت کی طلب
میرا ایماں ہے تِری چشمِ عنایت کی طلب
مقصدِ زیست نہیں ہے زر و دولت کی طلب
پاسِ ناموسِ وفا راہنمائے دل ہے
حسرتِ دید ہے اظہارِ حقیقت کی طلب
وہ بھی اب صیدِ ستم ہائے تغافل کیوں ہے
کھینچ لائی جسے صحراؤں میں رحمت کی طلب
خوبئ حسن قساوت پہ اتر آتی ہے
ہونے لگتی ہے جب انساں کو محبت کی طلب
بندگی اپنی ازل سے ہے شعارِ خِلقی
خواہشِ مدح کوئی اور نہ اجرت کی طلب
آئینہ میں مِرا ہمشکل بھی آئے نہ نظر
اے جفاکیش عجب ہے یہ قیامت کی طلب
خار سے کون بچاتا نہیں اپنا دامن
برگِ گل سے نہ ہوئی کس کو نزاکت کی طلب
ہم کو عشرت کدۂ قصر سے کیا مطلب ہے
کب ہوئی خانہ بدوشوں کو سکونت کی طلب
محو رکھتی ہے شب و روز تِرے ناظرؔ کو
تیری تصویر سے بڑھ کر تِری صورت کی طلب
عبداللہ ناظر
No comments:
Post a Comment